ف 2006 فميريكان كان كالس برادلي وولدروب في أمان الله و حفظه حتى قاله راسه نوض يا سيدي قتل مراتك و صاحبتها و جيب ولادك يتفرجو .. تشد فالحبس و المدعي العام تيطالب بحكم الاعدام و المتهم اعترف بالجريمة و قال بكل بساطة أنه ليلة قبل حس براسه شاعل و باغي غي مع من .. و لكن الدفاع دياله مابغاش هادشي و طلب من القاضي طلب غريب و لهو التحليل النفسي للمتهم و الجيني من الفوق .. و هنا لقاو أن برادلي عنده جين معروف بجين المحارب أو جين القاتل و لتيخليه ينزع نحو العنف أكثر من الشخص الطبيعي .. و بهكا طيحو له حكم الاعدام و خلاو السجن

واش القاتل أو السايكو لعنده جنوح نحو العنف واش هادشي بسبب المحيط دياله و القرارات دياله و لا الحتمية الجينية هي لتتلعب دور فهادشي و بالتالي هو مسير من طرف المورثات ؟ ويلا قلنا هادشي أو آمنا به واش هادشي تيخلينا نعرفه الواحد من صغره واش غايكون مجرم و قاتل و لا لا؟ ويلا عرفنا واش نقدرو نتاخدو إجراء راديكالي بحال الاجهاض أو القتل باش نعتقه فرضيا حياة ضحايا مستقبليين ممكن يكونوا و ممكن لا؟ وواش نقدرو نجزموا بما لا يمنح مكانا للشك أن أي شخص بهاد الجين راه غايكون قاتل؟ و فالأخير واش الجينات ديالنا تتأثر فينا و لا تتحكم و تسيطر؟

هاد الاسئلة لتيحاول المسلسل يجاوب عليها ف 20 حلقة من خلال قصة عالم اكتشف هاد الجين و حكومة باغا تمرر قرار إجهاض الأجنة لتتحمله و جوج أطفال بخلفيات مختلفة عندهم و طبيب سفاح مشدود فالحبس هو لبدا هادشي كامل

يلا ماركزتيش مزيان مع الشخصيات و الأحداث غاتضيع .. تنظن هذا هو السبب لخلا القناة تخرج حلقات خاصة تتشرح بعض النقط حيت فاش تتوصل للوسط د المسلسل كلشي تيتقلب و تتدوخ حرفيا .. شخصيا حبسته مدة باش نهضمه عاد رجعت نكمله .. و البلاصة فين حبسته من بعد فاش جيت نكمله راه تيولي المسلسل مسلسل آخر

القصة ممتعة بزاف واخا مظلمة و كئيبة و لكن عندها بعد عميق خصوصا فتطور العلم و كفاش ممكن نتحججوا بجيناتنا و واش من حقنا نتحججوا بها ولا لا و واش غا هي لتتأثر فينا .. و كفاش ممكن يكون الانسان حبيس لدماغه و يكون قاتل بالوراثة

طفل عادي ماعارفينوش واش عنده جين القاتل و لا لا و عايش فوسط متوتر و مريض و عنيف واش غايتحول لقاتل و مجرم و لا لا؟ و فالمقابل طفل عارفينه عنده هاد الجين و لكن عايش فوسط محب و هادئ و بمتابعة طبية واش غايتحول لقاتل و لا لا؟ و عاود طفل عارفينه عنده الجين و كلشي عارف و تيتم التنمر عليه بسبب كونه غريب سلوكيا بالاضافة للجو المشحون فالدار واش يلا لقا شي حد يسمع له و يهتم به و يحميه من الاخر و من راسه واش غايولي قاتل ولا لا؟ .. بعبارة أخرى واش الجينات كافية؟ علاه الانسان ماشي تداخل لبزاف ديال العوامل؟

شخصيا بالنسبة لي بجين و بلا جين .. المجتمع هو لتيصنع الوحوش