تيعجبني فاش تنديرو إسقاط لداكشي لتنعيشوه فعالم حيوانات .. أو فاش تناقشوا مشاكلنا الإنسانية في ظل قصة أبطالها حيوانات

الأنيم تيهضر على واحد العالم تيعيشوا فيه الحيوانات اللاحمة في وئام مع العاشبة في ظل قوانين صارمة .. و فواحد الثانوية تيتم تتويج حيوان تيكون البيستار ديالهم لدور قام به في ترسيخ قيم التسامح ما بين السكان فداك العام .. فهاد الثانوية كاين واحد الذئب سميته ليغوشي تيحاول يلقى طريقة باش يتحكم فغرائزه لتتخليه يشوف العواشب كفرائس فتيقرر يكون داك الشخص الذي يعيش في الظل و الذي يعتمد عليه الجميع و لممكن يكون محل تنمر من طرف اللواحم لاخرين لتيسخروا منه .. هاد النظام لعايشين فيه كله تيتهدد فاش تتطرا عملية قتل ” افتراس ” لواحد الطالب من طرف مجهول و تتولي أصابع الاتهام تتشير لأي حيوان ضخم بأنياب .. و فوسط هاد الجو المتوتر تيخلق ليغوشي مشاعر غريبة تجاه هارو الأرنبة

السلطة .. الفساد .. السوق السوداء .. التناقضات النفسية .. مفهوم العدل .. نسبية الخير و الشر .. الغرائز .. المقبول و الغير مقبول .. الطبيعي و الشاذ .. الحب .. الكره .. استحقاق المكانة بالجهد ولا بالحجم و القوة .. شكون حنا .. شنو تيعرفنا واش الداخل ديالنا ولا شكلنا .. واش ماضينا ولا حاضرنا .. كاع هاد الأسئلة و كثر تيناقشها هاد الإنمي الواعر و لتيتعتبر إنمي نفسي

الناس لعجباتهم زوتوبيا .. هذا طرحه أنضج بكثير