مسلسل بريطاني قصير من 6 الحلقات، خرج ف 2018 و الجزء الثاني يقال ربما غايخرج العام الجاي

أسرة مكونة من 5 الافراد تتهدم نهار تيقرر الأب أنه مابقاش باغي يستمر معهم و بالتالي تينسحب من حياتهم و تتلقى الأم راسها مجبرة تربي بناتها لراسها و تخلق إسم للعائلة و تتولي عندها شركة محاماة تترأسها مع بناتها و تيكونوا علامة مميزة فالضومين ديال قانون الأسرة و الزواج و الطلاق .. الأرامل السوداء مثلا

و لكن هادشي كامل تيتهدم نهار تيقرر الأب مورا 30 عام د الغياب يرجع فجأة و تيلقاو البنات ريوسهم مجبرين يخوضوا تراكمات عقود من حياتهم و يعيدوا النظر فيها و مع من عايشينها و القرارات لتخادت

المسلسل تيسلط الضوء على مؤسسة الزواج أو بالأحرى نهايتها، على كفاش تتولي العلاقة بشعة جدا واخا تكون البدايات ديالها خيالية .. كفاش خطأ بسيط ممكن يهدم سنين د الزواج .. كفاش غياب الأب تيأثر على الأولاد بطريقة خطيرة واخا يعياو مايغطيوا عليها و يتجاهلوها ممكن يبان التأثير مورا 30 عام .. كفاش حدث مزلزل لنفسية الطفل فالصغر بحال اختفاء الأب ممكن يخلق له شخصية قوية فوق القياس متتعطيش لراسها فرصة لترتاح فيها من الثقل لهازاه و تتحس بها غي تتجري باش تبقا ديما عيانة و مايبقاش عندها وقت و فرصة باش تفكر فالماضي .. أو شخصية تتقلب ديما على منقذ أو تترمى فأول علاقة بانت قدامها .. كفاش أن الصبر و الاستسلام من أجل الأطفال ماغاينفعهم بوالو و إنما غايخليهم يزيدوا يعيشوا فوسط سام بين أب و أم متيبغيوش بعضياتهم و ربما أسوء، متيحتارموش بعضياتهم

شخصيا ماسخيتش بالمسلسل و تنتسنى الجزء الثاني بفارغ الصبر و المسلسلات البريطانية زوينة و الله