واحد من بين المسلسلات لماسخيتش بهم يساليو
القصة تتهضر على قرية صغيرة تتوقع فيها حالات اختفاء لنساء هادي عشرين عام و مع انتقال هان جي وون المفتش الجديد من العاصمة تيكتشفوا جثة جديدة و تيرجع ملف دوك الاختفاءات تيتحل .. هاد جي وون غايلقى راسه شريك مع مفتش آخر أقل ما يقال عنه أنه مجنون و غير متوقع نهائيا و الأهم أنه كان المشتبه به فقضية قتل هادي عشرين عام و قضية اختفاء اخته التوأم
المسلسل غادي بواحد الطريقة تتخليك تشك فراسك .. كل حلقة من 16 حلقة تتشك فشخصية و فاللخر دكل حلقة تتبرأ هاديك و تتشك فوحدة جديدة .. و أجمل حاجة فيه هي الكيمياء بين لي دونج شيك و هان جي وون لهاد الأخير جاي على أساس أنه يشد لي دونج شيك حيت بالنسبة له هو المجرم ماشي مشتبه به و كفاش فهاد 16 حلقة كلشي تيتبدل و الضحية تيولي مجرم و المجرم ضحية و لتتشك فيه بريء و لمستحيل تشك فيه هو المجرم .. العلاقة بين لي دونج شيك و صحابه و كفاش تيدافع عليهم .. كفاش الرغبة في إمساك مجرم تتخليك تولي بحاله و شنو هي الحدود ديال الجنون فالنفس البشرية .. شنو لتيحدد لنا داك الخط الرفيع بين الصواب و الخطأ .. شنو لتيعرف لنا الاستقامة .. واش الماضي ديالنا غادي يرجع لنا يوما ما و لا صافي دفناه .. كفاش ممكن كاريير قد لخلا تتبينها بدمك و استقامة تتدعيها تيكون غلط وقع لك مرة وحدة كفيل باش يدمرها حيتاش بلاصة ماتعترف به و تواجهه تتقرر تدفنه و تغطيه بأغلاط أخرى و الكذبة تتجر موراها جبال ديال الكذب و النفاق .. كفاش ممكن تدمر حياة شي حد باتهام بدون دليل .. كفاش كما ممكن تعامل مع الظلم لتتواجه باستسلام و حزن و فشل تقدر تعتنقه و تعامل مع الحياة بسخرية كطريقة للمضي قدما .. الفساد فاش تيتجمعوا أصحاب المال مع أصحاب السلطة و السياسة .. الصداقة و العائلة فاش تيتعارضوا .. ولدك فاش تتجازف بحياتك و سمعتك باش تحميه أو تتقرر تضحي به باش تحمي راسك .. الإشاعة و تجييش الرأي العام فاش تيعرقل سير التحقيقات و تيخرج على حياة الناس .. الرشوة .. كفاش ممكن طموحك ياكلك بحال شي طوموبيل فشي تهويدة و الفران مقطع .. و بزاف د الحوايج آخرين اكتشفوها لريوسكم
المسلسل زوين بزاف و تيخليك تفكر فعجائب النفس البشرية و تنتمنى تستمتعوا به كما استمتعت أنا
MARYEM LAADIDAOUI 