ما بين 1986 و 1991 كانت وقعات سلسلة جرائم هزات كوريا مشات ضحيتها 14 بنت كلهم تلقاو ميتات مغتصبات و مخنوقات بالليبا ديالهم .. هاد الجرائم لحيرات البوليس فديك الفترة و لمالقاوش المجرم و لمع الأسف طاحت بالتقادم ” أغبى قانون” بقدرة قادر و حيت الروح عزيزة عند الله كما تنقولوا هاد المجرم و حيت لفيه شي فيس متيهنيهش غادي يقتل عاوتاني ف 1994 خت مراته و غادي يكون مشتبه به و من بعد غادي يتحاكم ف 1995 بالمؤبد، و لكن ف 2019 و بسبب تطور العلم غادي يقدروا يحددوا الحمض النووي دياله و يربطوه بالقضايا 14 لتسدوا و غادي يعترف بهم و لكن مع الأسف ماغاديش يتحاكم عليهم حيت التهم طاحوا

هاد الجريمة لكانت سابقة فكوريا غادي تلهم كتاب كتار و غايدار عليها كتر من 10 د الأعمال درامية ما بين أفلام و مسلسلات من بينها هاد المسلسل

فكوريا فالثمانينات بداو بنات تيتلاقاو مخنوقات بليباتهم و مكتفات و مليوحات فواحد الفيلاج صغير .. المحقق المكلف بهاد القضية غادي يحاول ما أمكن يلقى المجرم و فخلال بحثه غادي يتصادف معه فواحد النفق و فوسط العراك ديالهم غادي يلقى راسه انتقل عبر الزمن و خرج فنفس البلاصة و لكن مورا 30 عام .. بلا وراق بلا فهم لما حدث البلايص لتيعرفها تبدلات و الناس لتيعرفهم مابقاوش هنا و لكن الأكيد أن القاتل لعلى وديته وقع هادشي ماتشدش و الأدهى باقي تيقتل .. فعرف أنه باش يرجع للماضي خاصه يشد المجرم و فنفس الوقت يخفي هويته لأن تاحد ماغايتيقه

القصة مانهضروش عليها لأن كاع الأعمال الكورية لعلى الجريمة تتكون مصروعة الفارق تيكون فالشخصيات و علاقتهم و التمثيل و شخصيا عجباتني سيرورة الأحداث واخا بعض المرات تيجيني الملل و لعيا و تندوز و لكن حيت تيعجبني العمل يكون مركز فالقصة بعيدا عن الملهيات بحال مثلا tell me what you saw

عموما فالنهاية فواحد المشهد لكانت فيه المستشارة ديال الفرقة و لهي محللة جنائية تتختم المحاضرة ديالها بقولها أن التحليل الجنائي أو علم النفس الجنائي الهدف منه هو دراسة عقل المجرم باش تفهم الدوافع و الاضطرابات لتتخلقه و منه تساهم فحلها أو تجنبها مستقبلا و بالتالي تنقذ أرواح لأنه تاحد ماتيتزاد مجرم