شحال من مرض نفسي تنقدروا نتجنبوه أو نخرجوا منه بسبب شخص قرر يبقى معنا و ما يفلتش يدنا؟
المسلسل لمن 16 حلقة تيدوي على تلاتة د الناس تتلاقيهم الدنيا مع بعضياتهم بعد سنين و تيعيشوا حالة من المد و الجزر و هوما تيحاولوا يتفهموا و يتقبلوا بعضياتهم و فنفس الوقت يفهموا ريوسهم و المشاكل النفسية لتيعانيوا منها .. شنو ممكن يوقع يلا تلاقى متوحد مع وحدة عندها اضطراب الشخصية المعادية للمجتمع و واحد عمره كله و هو حاط قناع على وجهه و تيكذب على راسه؟
الشخصيات ديال المسلسل تتعيش أحداث متنوعة فواحد المصحة نفسية و فبعض الحلقات تيركزوا على شخصيات ثانوية تتعاني من أمراض نفسية تيحاولوا يسلطوا عليها الضوء .. باش فالنهاية تستوعب حاجة وحدة هي لتيدور عليها المسلسل كامل .. بعض المرات ماكاين تا مشكل فأنه يكون عندك مشكل و ماتكونش هو هذاك لأنه العالم كامل ماشي هو هذاك
المسلسل ممتيقاش أنه سالا .. حسيته خفيف ظريف دغيا طار .. فقالب كوميدي درامي تتضحك و تبكي و تخلع و كلشي .. عجباتني الفكرة ديال الرسومات و كل حلقة بعنوان قصة مشهورة و كفاش شخصية الكاتبة بسبب الاضطراب لعندها تيخليها تشوف واحد الوجه آخر أكثر سوداوية و قتامة فالروايات العالمية لكلها وردية و حب و إيجابية .. واحد الجانب لعمرنا ردينا له البال و لكن فاش تتركز معها تتلقا عندها الصح .. المهم أنصحكم بمشاهدته
MARYEM LAADIDAOUI 