هاد الفيلم لفيه ساعتين تيهضر على ظاهرة التنمر، الاثار النفسية لتتخلف عند الشخص خصوصا فاش تيكون عاجز على الدفاع عن نفسه، و حتى على الاثار النفسية لتتخلي عند المتنَمِّر فاش تيفقد علاقاته مع الناس كلهم بسبب سلوكه العنيف .. الجروح النفسية لممكن توصل للتفكير فالانتحار او الشروع فيه .. كفاش أنه اختلافك عن الآخرين حتى يلا ماكانش بيديك تيولي نقمة عليك و سبب فأنك تكره نفسك .. كفاش تيخصك تتقبل عيوبك و اختلافك و نقاط ضعفك

Things would have been so much better back then If we had heard each other’s voices.

الفيلم تيهضر على شوكو نيشيميا واحد البنت صماء تحولات للمدرسة الابتدائية لتيقرا فيها ايتشيدا و صحابه لبقاو تيضاربوا معها و يضايقوها و يتنمروا عليها عموما حتى تحولات و موراها كلشي تيقلب على ايتشيدا و تيحمله المسؤولية حتى تيتلاقاو من بعد فالليسي

We live in a world in which judgement is more important than getting to know that person

الفيلم سلط الضوء على الانتحار كحل شافوه البطلين باش ينهيوا عذابهم النفسي، خصوصا لشخص بحال نيشيميا عايشة فعالم صامت و عاجزة تعبر على مشاعرها .. و كفاش صحابها و ختها و امها و محيطها من صغرها تيحاول يخفف عليها و يخرجها من الاحساس د العجز لكان مسيطر عليها حتى قررات هي بنفسها تخرج منه و تصلح من نفسها و من علاقة المحيطين بها .. الشيء لتيدل على ان الشخص المكتئب او لعنده مشاكل نفسية بحال هكا و ميولات. انتحارية تيخاصنا نتعاملوا معه بحذر لأنه شخص هش ماشي نكملوا عليه بتعليقاتنا و نزيدو فالجرح بلاصة مانعالجوه .. و فالاخير راه التخلص من هاد الافكار تيبقى قرار شخصي و حنا كمحيطين بالمعني بالامر تنتحملوا مسؤولية حثه على اتخاذه

When nobody has cared for so long It’s hard to accept when someone finally does

شيء آخر .. الناس لعاجزين على السمع و النطق تيبذلوا مجهود باش يتواصلوا معنا .. مافيها باس يلا بذلنا تاحنا نفس المجهود باش منحسسوهومش انهم ناقصين و معيوبين .. حيت يلا درنا هكا فراه حنا لناقصين و حنا لمعيوبين