كانت واحد الحلقة فالدحيح سميتها كيف بدأ الكلب .. تيقول فيها أن أصل الكلاب ذئاب تم ترويضها من طرف شي عشيرة فشي قرن و مع التطور ديالها مع الأجيال و تأقلمها مع الوضع الجديد تحولوا ذوك الذئاب للكلاب لتنعرفوا دبا الأليفة اللطيفة للجين د الافتراس عندها مطمور و مختفي ماشي بنفس وحشية الذئاب لنجاو من هاد عملية التدجين

هادشي تنتفكروا ونا تنشوف هاد الفيلم لتيهضر على هادشي .. قبل مانبداه حسابني غايكون شي نسخة جديدة من ماوكلي 😂😂 و لكن صدق تيهضر على هاد العلاقة لغيرات الإنسانية من بعد

قبل 20000 عام فأوروبا و فوسط حملة صيد دارتها واحد العشيرة للجاموس تيطيح ولد الزعيم من فوق واحد الجرف و تيحسابلهم مات و لكن تيفيق من بعد و تيحاول يرجع لقبيلته و فالطريق تيهاجموه الذئاب و تيجرح واحد منهم و حيت هو قلبه هشيش و متيقدش يقتل عاون الذئب المجروح و ولات بيناتهم علاقة صداقة .. المشهد الأخير فالفيلم فكرني ف الستارك

الفيلم ممل شوية و لكن تيأسرك تعرف اشنو غايوقع للدري و ذئبه .. و تيبين لك أنه ماشي عيب يلا كنت شخص مسالم و غير قادر على إيذاء الآخر كما بغا يكون واخا تكون معيورة الدوار ولكن متعرفش أشمن علاقة غاتربح بهاد الميزة واشنو ممكن تغير فالعالم ⁦

يلاه للقى شي ضبع يتصاحب معه ماتعرفوا يتعلموا شي گنوس و ينقصو الخبث لفيهم